Crita Ajisaka

Ajisaka

Ajisaka karo abdine loro wis teka ing tanah Jawa, anjujug ing nagara Mendhang Kamolan. Sing jumeneng ratu ing kono Prabu Dewata Cengkar. Dene karemane Sang Prabu kresa dhahar daging wong. Kawulane akeh sing padha giris, malah akeh sing ngalih menyang nagara liya jalaran kuwatir menawa didhahar Sang Prabu. Patihe kang aran Kyai Tengger ditugasi golek wong sing arep didhahar Sang Prabu.

            Kacarita Ajisaka ana ing nagara Mendhang Kamolan jumeneng dadi guru sing mulang muruk kawruh rupa-rupa. Wong-wong padha mlebu dadi muride. Para muride padha asih tresna marang Ajisaka, awit atine becik banget sarta dhemen tutulung. Nalika samana Ajisaka mondok ing omahe Nyai Rondha Sangkeran, lan dheweke dipek anak karo Nyai Rondha. Kyai Patih lan Nyai Rondha uga dadi muride Ajisaka.

            Anuju sawijining dina Sang Prabu Dewata Cengkar duka banget marang Kyai Patih, awit wis telung dina durung bisa nyaosi wong kanggo dhahar. Kyai Patih susah banget marga ing nagara Mendhang Kamolan katon sepi mamring jalaran akeh wong sing padha ngalih menyang nagara liya utawa ndhelik ing alas utawa guwa-guwa.

            Kyai Patih banjur tilik ing omahe Nyai Rondha Sangkeren, lan ngandhakake dukane Sang Prabu. Nalika iku, Ajisaka melu jagongan lan ngerti apa sing dadi susahe Kyai Patih. Krungu critane Kyai Patih mau, banjur Ajisaka matur : “ Paman kula kemawon sampeyan caosaken dados dhaharipun sang Prabu”. Nyai Rondha lan Kyai Patih kaget krungu ature Ajisaka kaya mangkono mau. Wangsulane Kyai Patih : “Sampun, Angger kula aturi nglajengaken mulang muruk titiyang ing Mendhang Kamolan sedaya “. Sapunika ugi kula sampeyan aturaken dhateng Sang Prabu, nanging kula gadhah panyuwun saderengipun kapragat. Kula nyuwun Siti ing Mendhang Kamolan wiyaripun namumng saiket kula.

            Cekake crita Ajisaka banjur nemoni Prabu Dewata Cengkar mratelakake yen gelem dadi mangsane. Panjaluke Ajisaka mau, banjur dikabulna karo sang Prabu. Ajisaka banjur nyepot iket sing ning sirah, lan digelar, saya suwe saya adoh nganti tekan segara kidul. Prabu Dewata Cengkar dijengkakake, kecemplung segara, malih dadi baya putih. Swarane nggegiris nganti kaya gludhug. Awake gedhe, yen ngambang nganti kaya pulo ing tengahe segara.

            Sawise Prabu Dewatacengker ora jumeneng ing Nagara Mendhang Kamolan, banjur Ajisaka dijumenengake dadi ratu ing nagara kasebut. Ajisaka disubya-subya dening rakyate lan nagarane tentrem,ayem, merga wis ora ana sing diwedeni.